राज्याच्या विकासात कृषी विभागाचा मोलाचा वाटा

0

कृषी राज्यमंत्री सदाभाऊ यांची माहिती
कोल्हापूर :
राज्य शासनाने शेती आणि शेतकर्‍यांच्या हितास सर्वोच्च प्राधान्य दिले असून राज्याच्या विकासात कृषी विभागाचा मोलाचा वाटा आहे, असे गौरवोदगार कृषिराज्यमंत्री सदाभाऊ खोत यांनी आज येथे बोलतांना काढले.  येथील पोलीस परेड ग्राऊंडवर आयोजित केलेल्या तरंग राज्यस्तरीय कृषी कला-क्रीडा महोत्सवाचा प्रारंभ कृषी राज्यमंत्री सदाभाऊ खोत यांच्या हस्ते करण्यात आला. त्याप्रसंगी आयोजित समारंभात ते बोलत होते. यावेळी कृषी आयुक्त सचिंद्र प्रतापसिंह, निविष्ठा व गुणनियंत्रणचे संचालक विजयकुमार इंगळे, राष्ट्रकुल कुस्ती सुवर्णपदक विजेते राम सारंग व भारतीय कबड्डी संघाचे तुषार पाटील यांच्यासह कृषी विभागातील वरिष्ठ अधिकारी उपस्थित होते.

कृषी विभाग कृषी कर्मचार्‍यांच्या माध्यमातून शेतकर्‍यांचे हित जोपासत असल्याने सांगून कृषिराज्यमंत्री सदाभाऊ खोत म्हणाले की, कृषी विभागांतर्गत कार्यरत कर्मचारी कल्याण निधीसाठी शासन सकात्मक असून अधिकारी-कर्मचार्‍याच्या अडीअडचणी आणि प्रश्‍न प्राधान्यक्रमाने सोडविले जातील. कृषी क्षेत्रातील प्रगत तंत्रज्ञान शेतकर्‍यांच्या बांधापर्यंत प्रभावीपणे पोहोचविण्यात कृषी कर्मचार्‍यांची महत्त्वपूर्ण भूमिका असल्याचेही ते म्हणाले.
तरंग राज्यस्तरीय कृषी कला, क्रीडा महोत्सवाच्या माध्यमातून कृषी विभागातील अधिकारी-कर्मचार्‍यांच्या कला-गुणांना निश्‍चितपणे वाव मिळणार असून यापुढील काळात कृषी विभागातील कर्मचार्‍यांना प्रोत्साहन मिळावे म्हणून खेळाडू कर्मचार्‍यांचा गौरव करण्याचा मानस असल्याचेही कृषीराज्यमंत्री सदाभाऊ खोत यांनी यावेळी सांगितले. शेतकर्‍यांना भेडसावणार्‍या समस्यांच्या तात्काळ निराकरणासाठी कृषी विभाग सज्ज आणि सजग असल्याचेही ते म्हणाले.

यावेळी कृषी आयुक्त सचिंद्र प्रतापसिंह म्हणाले की, कृषी विभागातील अधिकारी, कर्मचार्‍यांनी मातीशी असलेलं नातं अधिक जिद्द आणि कष्टाद्वारे भक्कम करावे. याद्वारे शासन शेतकर्‍यांसाठी राबवित असलेल्या योजना आणि उपक्रम अधिक प्रभावीपणे शेतकर्‍यांपर्यंत पोहोचविण्यात सक्रीया व्हावे, असे आवाहनही केले. या स्पर्धेतील सहभागी अधिकारी, कर्मचार्‍यांना त्यांनी शुभेच्छा दिल्या.

प्रारंभी कोल्हापूर विभागीय कृषी सहसंचालक दशरथ तांबाळे यांनी स्वागत व प्रास्ताविक केले. ते म्हणाले की, राज्याचे कृषीमंत्री चंद्रकांत पाटील यांच्या मार्गदर्शनाखाली आणि सहकार्यातून तरंग राज्यस्तरीय कृषी कला-क्रीडा महोत्सव 13 जानेवारी 2019 पर्यंत आयोजित करण्यात आला असून यामध्ये राज्यातील सर्व 34 जिल्ह्यांमधील तसेच कृषी आयुक्तालय स्तरावरील 1397 पुरुष खेळाडू तर 393 महिला खेळाडू असे 1790 पुरूष व महिला खेळाडू सहभागी झाले आहेत. या महोत्सवामध्ये 12 खेळ प्रकारांचा समावेश असून यामध्ये क्रिकेट, हॉलिबॉल, खो-खो, कबड्डी, 4 बाय 100 रिले, गोळाफेक, धावणे, लांबउडी, टेबल टेनिस, बुध्दिबळ, बॅडमिंटन आदी खेळ प्रकारांचा समावेश आहे.
याप्रसंगी कृषी संचालक विजयकुमार इंगळे, कृषिसंचालक प्रल्हाद पोकळे, राष्ट्रकुल कुस्ती सुवर्णपदक विजेते राम सारंग व राष्ट्रीय कबड्डी खेळाडू तुषार पाटील आदि मान्यवरांनी आपले मनोगत व्यक्त करुन खेळाडू अधिकारी-कर्मचार्‍यांना शुभेच्छा दिल्या.
यावेळी सर्व खेळाडूंनी कृषिराज्यमंत्री सदाभाऊ खोत यांना संचलनाव्दारे मानवंदना दिली. यावेळी कोल्हापूर जिल्ह्याच्या रांगड्या शेतकरी कला आणि क्रीडा क्षेत्राला साजेशा संचलनाबरोबरच यवतमाळ, गडचिरोली आणि रत्नागिरीच्या सांस्कृतिक संचलनाने उपस्थितांची मने जिंकली. या कार्यक्रमात राष्ट्रीय पातळीवरील विविध क्रीडा प्रकारात निवड झालेल्या कृषी विभागातील खेळाडूंचा तसेच त्यांच्या पाल्यांनी विविध क्षेत्रात केलेल्या उल्लेखनीय कामगिरीबद्दल त्यांचाही गौरव करण्यात आला.

या कार्यक्रमास आत्माचे संचालक अनिल बनसोडे, मृदसंधारण संचालक डॉ. के.पी.माते, निवृतत कृषि संचालक मुधकर घाग, तसेच राज्यातील विभागीय कृषी सहसंचालक, जिल्हा अधीक्षक कृषी अधिकारी उपस्थित होते. कृषी पर्यवेक्षक संघटनेचे अध्यक्ष अतुल जाधव, कृषी सहायक संघटनेचे अध्यक्ष संतोष पाटील यांच्यासह विभागातील सर्व अधिकारी व कर्मचारी वृंद महोत्सव यशस्वी करण्यासाठी परिश्रम घेत आहेत. या महोत्सवासाठी तमदलगे येथील 108 शेतकरी समुहाच्या संजीवनी ग्रो प्रोड्यूसर कंपनीने 400 डझन केली खेळाडूंना उपलब्ध करुन दिली.

शेवटी विभागीय अधीक्षक कृषी अधिकारी उमेश पाटील यांनी आभार प्रदर्शन केले. सुरुवातीला कला व क्रीडा महोत्सवात सहभागी पथकांचे संचलनाने पाहुण्यांचा मानवंदना देण्यात आली.

 

 

सदर सत्रासाठी आपण ही आपल्या कडील माहिती / लेख इतर शेतकऱ्यांच्या सोयीसाठी [email protected] या ई-मेल आयडी वर किंवा   8888122799 या नंबरवर पाठवू शकतात. आपण सादर केलेला लेख / माहिती आपले नाव व पत्त्यासह प्रकाशित केली जाईल

Leave A Reply

Your email address will not be published.